धाराशिव पूरग्रस्तांना शिवसेनेचा आधार – उद्या उपमुख्यमंत्री शिंदे आणि पालकमंत्री सरनाईकांचा दौरा
धाराशिव दि.२३(प्रतिनिधी):मराठवाड्यात अवकाळी पावसामुळे आलेल्या महापुराने अनेक गावं उद्ध्वस्त झाली असून शेकडो कुटुंबं उघड्यावर पडली आहेत. या आपत्तीग्रस्त नागरिकांच्या मदतीला शिवसेना आणि युवासेना धावून आली आहे. उपमुख्यमंत्री एकनाथ शिंदे यांच्या नेतृत्वाखाली आणि पालकमंत्री प्रताप सरनाईक यांच्या पुढाकाराने धाराशिव जिल्ह्यातील पूरग्रस्तांना जीवनावश्यक साहित्य आणि आरोग्य सेवा पुरविण्यात येणार आहे.
या पार्श्वभूमीवर उद्या दिनांक २४ सप्टेंबर रोजी पालकमंत्री प्रताप सरनाईक धाराशिव जिल्ह्यात दाखल होणार असून पूरग्रस्तांना प्रत्यक्ष जीवनावश्यक वस्तूंचे वाटप करतील. यावेळी उपमुख्यमंत्री एकनाथ शिंदे देखील जिल्ह्यात येऊन पूरग्रस्त भागाचा आढावा घेणार आहेत.
शिवसेनेच्यावतीने १२,५०० कुटुंबांना अन्नधान्य, कपडे आणि अन्य जीवनावश्यक साहित्याचे वाटप करण्यात येणार असल्याचे अधिकृत सूत्रांनी सांगितले. तसेच आरोग्य सेवा उपलब्ध करून देण्यासाठी स्वतंत्र आरोग्य वाहिनीही कार्यरत करण्यात आली आहे. मदतीचे ट्रक आणि आरोग्यसेवा आजच उपमुख्यमंत्री एकनाथ शिंदे यांच्या उपस्थितीत मराठवाड्याकडे रवाना करण्यात आले.
“या महाप्रलयामुळे नागरिक हतबल झाले आहेत. अशा कठीण काळात त्यांच्या पाठीशी खंबीरपणे उभे राहणे ही आपली जबाबदारी आहे. शिवसैनिक पूरग्रस्तांच्या सावरण्यासाठी सर्वोतोपरी प्रयत्न करतील,” असे राज्याचे परिवहन मंत्री तथा धाराशिव जिल्ह्याचे पालकमंत्री प्रताप सरनाईक यांनी सांगितले.
लोकमदत न्यूज “सत्य शोधून लिहिण्याची ताकद”
संपादक अमजद सय्यद 8390088786
