एसटी कर्मचाऱ्यांना दिलासा…वेतनवाढीचा थकीत हप्ता खात्यात जमा – परिवहनमंत्री प्रताप सरनाईक
मुंबई / लोकमदत न्यूज
राज्याच्या कानाकोपऱ्यात धावणाऱ्या ‘लालपरी’ला आपल्या घामाने आणि कष्टाने जिवंत ठेवणाऱ्या सुमारे ८६ हजार एसटी कर्मचाऱ्यांच्या वेतनवाढीचा थकीत हप्ता अखेर त्यांच्या बँक खात्यात जमा करण्यात आला आहे. परिवहनमंत्री प्रताप सरनाईक यांनी दिलेल्या शब्दाप्रमाणे हा हप्ता वर्ग करण्यात आल्याने कर्मचाऱ्यांमध्ये समाधानाचे वातावरण निर्माण झाले आहे.
परिवहनमंत्री प्रताप सरनाईक यांनी सांगितले की, काही तांत्रिक अडचणी व निधीअभावी फेब्रुवारी महिन्यात हा हप्ता देणे शक्य झाले नव्हते. त्यामुळे कर्मचाऱ्यांमध्ये नाराजीची लाट उसळली होती. परिस्थितीचे गांभीर्य ओळखून त्यांनी मुख्यमंत्री व दोन्ही उपमुख्यमंत्र्यांशी सातत्याने चर्चा करत २१० कोटी रुपयांच्या निधीची मागणी केली होती.
या पाठपुराव्याला यश मिळत तत्काळ १०० कोटी रुपयांचा निधी उपलब्ध करून देण्यात आला. उर्वरित रक्कमही लवकरच प्राप्त होणार असल्याचे त्यांनी स्पष्ट केले. त्यानंतर फेब्रुवारी महिन्याचा थकीत वेतनवाढीचा हप्ता कर्मचाऱ्यांच्या खात्यात जमा करण्यात आला.
“हा केवळ आर्थिक दिलासा नसून शासनाच्या संवेदनशीलतेचा आणि कर्मचाऱ्यांप्रती असलेल्या बांधिलकीचा प्रत्यय आहे,” असेही सरनाईक यांनी नमूद केले.
लोकमदत न्यूज सत्य शोधून लिहिण्याची ताकद
संपादक अमजद सय्यद 8390088786
