लोकमदत न्यूजचा दणका! सांजा रोडवरील दुर्दशेची बातमी प्रसिद्ध होताच प्रशासन-ठेकेदार हलले धुळीवर पाणी टाकण्याची तात्पुरती मलमपट्टी सुरू!
धाराशिव | लोकमदत न्यूज
धाराशिव शहरातून बाहेर पडण्याचा प्रमुख मार्ग असलेल्या सांजा रोडवरील भीषण अवस्थेबाबत लोकमदत न्यूजमध्ये १ मार्च २०२६ रोजी बातमी प्रसिद्ध होताच प्रशासन आणि संबंधित ठेकेदार खडबडून जागे झाल्याचे चित्र पाहायला मिळत आहे. अनेक दिवसांपासून खड्डे, धूळ आणि वाहतूक कोंडीने त्रस्त झालेल्या या रस्त्याबाबत वृत्त प्रसिद्ध होताच ठेकेदाराच्या वतीने तातडीने काही हालचाली सुरू करण्यात आल्या आहेत.
सध्या सांजा रोडवर उडणारी धूळ कमी करण्यासाठी दररोज दोन वेळा टँकरद्वारे पाणी मारण्याचे काम सुरू करण्यात आले आहे. मात्र नागरिकांच्या मते हा उपाय केवळ तात्पुरती मलमपट्टी असून प्रत्यक्ष रस्त्याच्या नूतनीकरणाचे काम सुरू करण्याची गरज आहे.
छत्रपती शिवाजी महाराज चौक ते भवानी चौक या अवघ्या दीड किलोमीटरच्या रस्त्याची अवस्था अत्यंत दयनीय झाली आहे. या मार्गावर मोठ्या प्रमाणात खड्डे पडल्यामुळे वाहनधारकांना अर्धा ते पाऊण तास वेळ लागत असल्याची तक्रार नागरिकांनी केली होती. या गंभीर परिस्थितीकडे लक्ष वेधणारी बातमी लोकमदत न्यूजमध्ये प्रसिद्ध झाल्यानंतर प्रशासन आणि ठेकेदाराने तातडीने धूळ नियंत्रणासाठी पाणी मारण्याची प्रक्रिया सुरू केली.
मात्र स्थानिक नागरिकांनी या उपायावर नाराजी व्यक्त केली आहे. “धुळीवर पाणी मारून प्रश्न सुटणार नाही. रस्त्याचे काम मंजूर असूनही अनेक वर्षे प्रलंबित आहे. तात्पुरत्या उपायांऐवजी प्रत्यक्ष कामाला सुरुवात करावी,” अशी मागणी नागरिकांकडून होत आहे.
या मार्गावरून सांजा, सारोळा, सकणेवाडी, चिखली, राजुरी, बोरगाव, समुद्रवाणी, सांगवी, कामेगाव, पाडोळी, औसा, शिवली, वाघोली, काजळा, मेंढा, घुगी, नितळी आदी गावांतील हजारो नागरिक दररोज प्रवास करतात. त्यामुळे या रस्त्याची अवस्था सुधारण्याची मागणी दिवसेंदिवस तीव्र होत आहे.
दरम्यान, लोकमदत न्यूजच्या दणक्यानंतर प्रशासनाने तातडीने हालचाली सुरू केल्या असल्या तरी नागरिकांचा प्रश्न “केवळ धूळ दाबण्यासाठी पाणी मारणे हा उपाय आहे का? की प्रत्यक्ष रस्त्याच्या कामाला सुरुवात होणार?”
आता प्रशासन, लोकप्रतिनिधी आणि ठेकेदार खरोखरच या गंभीर प्रश्नावर ठोस पावले उचलणार की पुन्हा केवळ तात्पुरत्या उपायांवरच समाधान मानले जाणार, याकडे संपूर्ण शहराचे लक्ष लागले आहे.
लोकमदत न्यूज सत्य शोधून लिहिण्याची ताकद संपादक अमजद सय्यद 8390088786
