‘सर्व धर्म समभाव’चा संदेश देत एस एम ग्रुप साजरी करणार डॉ.बाबासाहेब आंबेडकर जयंती
एस एम ग्रुपच्या अध्यक्षपदी निखिल मंजुळे तर उपाध्यक्षपदी सुमित साबळे यांची निवड …शंकर माने यांच्या मार्गदर्शनाखाली जयंती उत्सवाला मिळते सामाजिक ऐक्याची दिशा
धाराशिव | लोकमदत न्यूज
एस एम ग्रुप आयोजित विश्वभूषण बोधिसत्व डॉ. बाबासाहेब आंबेडकर यांच्या १३५ व्या जयंती उत्सवाच्या नियोजनासाठी बैठक संपन्न झाली. मार्गदर्शक शंकर माने यांच्या मार्गदर्शनाखाली झालेल्या या बैठकीत जयंती उत्सव समितीची कार्यकारिणी जाहीर करण्यात आली.
या बैठकीत अध्यक्षपदी निखिल मंजुळे, उपाध्यक्षपदी सुमित साबळे तर सचिवपदी खंडू आपुणे यांची सर्वानुमते निवड करण्यात आली. बैठकीस रोहित जाधव, समीर अरब, गौतम बनसोडे सर, कृष्णा भोसले यांच्यासह मोठ्या संख्येने युवक उपस्थित होते.
एस एम ग्रुपच्या वतीने वर्षभर विविध सामाजिक उपक्रम राबवले जातात. यामध्ये शालेय विद्यार्थ्यांना शालेय साहित्य वाटप, गरजू महिलांना साडी वाटप, अन्नधान्य वितरण अशा अनेक उपक्रमांचा समावेश असतो. त्याच अनुषंगाने यावर्षी देखील डॉ. बाबासाहेब आंबेडकर यांच्या जयंतीनिमित्त विविध सामाजिक व सांस्कृतिक कार्यक्रमांचे आयोजन करण्यात येणार असल्याची माहिती ग्रुपचे संस्थापक मार्गदर्शक शंकर माने यांनी बैठकीत दिली.
दरवर्षीप्रमाणे यंदाही जयंतीदिनी भव्य अन्नदान कार्यक्रम आयोजित केला जाणार असून इंदिरानगर येथून जयंतीची मिरवणूक मोठ्या उत्साहात व शांततेत काढण्याचा निर्णय या बैठकीत घेण्यात आला. तसेच जयंती मिरवणुकीच्या आयोजनासाठी एस एम ग्रुपची कार्यकारिणीही निवडण्यात आली.
एस एम ग्रुपची जयंती “सर्व धर्म समभाव” या घोषवाक्याखाली साजरी केली जाते. विशेष म्हणजे दरवर्षी मंडळाच्या वतीने विविध जाती-धर्मातील युवकांना अध्यक्षपदाची संधी दिली जाते. त्यामुळे सामाजिक ऐक्याचा संदेश देणारे धाराशिवमधील हे एकमेव मंडळ म्हणून एस एम ग्रुपकडे पाहिले जाते. यंदाही त्याच परंपरेनुसार डॉ. बाबासाहेब आंबेडकर यांची जयंती मोठ्या उत्साहात साजरी करण्याचा निर्धार बैठकीत व्यक्त करण्यात आला.
लोकमदत न्यूज सत्य शोधून लिहिण्याची ताकद संपादक अमजद सय्यद 8390088786
