कत्तलीसाठी बेकायदेशीर वाहतूक करताना जनावरे जप्त पोलिसांच्या तत्परतेमुळे चार गोवंशीय जनावरांचे प्राण वाचले
धाराशिव | लोकमदत न्यूज
धाराशिव शहरात जनावरांवर अत्यंत निर्दयपणे वागणूक देत बेकायदेशीर वाहतूक करणाऱ्या आरोपीविरोधात धाराशिव शहर पोलिसांनी कठोर कारवाई करत गुन्हा दाखल केला आहे. पोलिसांच्या या धाडसी आणि संवेदनशील कारवाईमुळे चार गोवंशीय जनावरांचे प्राण वाचले असून नागरिकांकडून पोलिसांचे कौतुक होत आहे.
पोलिसांकडून मिळालेल्या माहितीनुसार, मैनोद्दीन उमर शेख (वय 37, रा. फकीरा नगर, वैराग नाका, धाराशिव) हा संशयित आरोपी दि. 17 मार्च 2026 रोजी सकाळी सुमारे 11 वाजण्याच्या सुमारास वासु वैराग रोड, सय्यदनगर परिसरात लिलॅन्ड कंपनीच्या चारचाकी वाहन (क्र. एमएच 25 पी 5718) मधून गोवंशीय जनावरांची वाहतूक करताना आढळून आला.
या वाहनामध्ये एक जर्शी गाय व इतर गावरान गायी अशा एकूण सुमारे 4,15,000 रुपये किंमतीच्या जनावरांना कोणतीही चारा-पाणी व्यवस्था न करता, अत्यंत निर्दयतेने बांधून ठेवण्यात आले होते. प्राथमिक तपासात ही जनावरे कत्तलीसाठी बेकायदेशीररित्या नेत असल्याचे समोर आले.
धाराशिव शहर पोलिसांनी वेळीच धडक कारवाई करीत वाहनासह जनावरे ताब्यात घेतली आणि आरोपीविरुद्ध प्राण्यांवरील क्रूरतेस प्रतिबंध अधिनियम 1960 च्या कलम 11(1)(बी) सह 5(अ) अंतर्गत गुन्हा नोंदवला आहे.
या कारवाईमुळे पुन्हा एकदा धाराशिव पोलिसांची जनतेप्रती जबाबदारी आणि प्राणिमात्रांबद्दलची संवेदनशीलता अधोरेखित झाली आहे. बेकायदेशीर कत्तल आणि प्राण्यांवरील अत्याचारांविरोधात पोलिसांनी घेतलेली ही कठोर भूमिका समाजासाठी आदर्श ठरत आहे.
दरम्यान, अशा प्रकारच्या घटनांवर कठोर कारवाई करून दोषींना शिक्षा व्हावी, अशी मागणी प्राणीप्रेमी व नागरिकांकडून होत आहे. तसेच, अशा प्रकारची माहिती त्वरित पोलिसांना देऊन सहकार्य करण्याचे आवाहनही धाराशिव शहर पोलिसांच्या वतीने करण्यात आले आहे.
लोकमदत न्यूज सत्य शोधून लिहिण्याची ताकद
संपादक अमजद सय्यद 8390088786
