लोकमदत न्यूजचा दणका धाराशिव नगरपरिषदेकडून अनधिकृत होर्डिंगविरोधात धडक मोहीम
सर्वसाधारण सभेचा एकमताने ठराव मुख्याधिकारी नीता अंधारे यांच्या आदेशान्वये तात्काळ अंमलबजावणी
धाराशिव | लोकमदत न्यूज
धाराशिव शहरातील अनधिकृत होर्डिंगच्या प्रश्नावर अखेर ठोस पावले उचलण्यात आली असून नगरपरिषदेकडून व्यापक कारवाई मोहीम सुरू करण्यात आली आहे. शहरात वाढलेल्या बेकायदेशीर होर्डिंगमुळे निर्माण झालेल्या समस्यांवर ‘लोकमदत न्यूज’ने सातत्याने प्रकाश टाकत प्रशासनाचे लक्ष वेधले होते. या पाठपुराव्यानंतर नगरपरिषद प्रशासन अॅक्शन मोडमध्ये आले असून कारवाईला वेग आला आहे.
नगरपरिषद सर्वसाधारण सभेत अनधिकृत होर्डिंग तात्काळ हटवण्याचा ठराव सर्व पक्षांच्या वतीने एकमताने मंजूर करण्यात आला. या ठरावाची प्रभावी अंमलबजावणी करत कर्तव्यदक्ष व शिस्तप्रिय मुख्याधिकारी नीता अंधारे यांनी तात्काळ आदेश देत शहरातील अनधिकृत होर्डिंग हटवण्याची मोहीम सुरू केली. त्यांच्या आदेशानंतर स्वच्छता विभागाचे संबंधित अधिकारी व कर्मचाऱ्यांनी तत्काळ कारवाईला सुरुवात केली आहे.
शहरातील अनेक ठिकाणी नियमबाह्य पद्धतीने लावण्यात आलेल्या होर्डिंगमुळे वाहतूक, सौंदर्यीकरण तसेच विद्युत सुरक्षेचे प्रश्न निर्माण होत होते. यावर नियंत्रण मिळवण्यासाठी नगरपरिषद प्रशासनाने आक्रमक भूमिका घेतली आहे. मात्र, काही राजकीय घटकांकडून अजूनही आदेशाचे उल्लंघन होत असल्याचे दिसून येत आहे.
या पार्श्वभूमीवर प्रशासनाने सर्व राजकीय पक्ष, लोकप्रतिनिधी, पदाधिकारी व सामाजिक कार्यकर्त्यांना स्पष्ट आवाहन केले आहे की, नगरपालिकेने निश्चित केलेल्या फिक्स पॉईंटवरच होर्डिंग लावावीत. याशिवाय होर्डिंगसाठीचे दर कमी करण्यात आले असून नियमीत परवानगी घेण्यास प्रोत्साहन देण्यात येत आहे.
स्वच्छता निरीक्षक तथा उप मुख्याधिकारी अभिजीत गोरे यांनी सांगितले की, “अनधिकृत होर्डिंगला कोणतीही मुभा नाही. केवळ अधिकृत ठिकाणीच होर्डिंग लावावीत. तसेच प्रत्येक होर्डिंगवर परवानगीची तारीख व QR कोड नमूद करणे बंधनकारक करण्यात आले आहे. नियमांचे उल्लंघन केल्यास कठोर कारवाई केली जाईल.”
दरम्यान, ‘लोकमदत न्यूज’ने अनधिकृत होर्डिंगच्या मुद्द्यावर वारंवार वृत्तप्रसिद्धी करून प्रशासनाला जागे केले. या सातत्यपूर्ण पाठपुराव्यामुळेच ही कारवाई शक्य झाल्याची भावना नागरिकांतून व्यक्त होत असून, शहरातून ‘लोकमदत न्यूज’चे आभार मानले जात आहेत.
नगरपरिषदेकडून सुरू असलेल्या या मोहिमेमुळे धाराशिव शहर अधिक स्वच्छ, सुरक्षित व सुबक होण्यास मोठी मदत होणार असल्याचे नागरिकांचे मत आहे.
लोकमदत न्यूज सत्य शोधून लिहिण्याची ताकद संपादक अमजद सय्यद 8390088786
