धाराशिव,दि.०२ (अमजद सय्यद): सन 1987 साली धाराशिव जिल्हा पोलीस दलात रुजू झालेले श्रेपोउपनि/871 प्रदीप भगवानराव साळुंखे हे तब्बल 38 वर्षांची प्रदीर्घ व कर्तव्यनिष्ठ सेवा करून दिनांक 31 ऑगस्ट 2025 रोजी नियत वयोमानानुसार सेवानिवृत्त होत आहेत.
आपल्या सेवाकाळात त्यांनी पोलीस मुख्यालय, पो.स्टे. भुम, कळंब, वाशी, तुळजापूर, तामलवाडी तसेच जिल्हा विशेष शाखा येथे जबाबदारी पार पाडली. इमाने-इतबारे व प्रामाणिकपणे नोकरी करत त्यांनी नागरिकांना न्याय मिळवून देण्यासाठी विशेष प्रयत्न केले. त्यांच्या तपासकामामुळे अनेक आरोपींना शिक्षा झाली असून त्यांची ओळख जिल्ह्यातील “सिंघम” पोलीस अधिकारी / कर्मचारी म्हणून निर्माण झाली होती.
कर्तव्यदक्ष, शिस्तप्रिय आणि न्यायप्रिय अधिकारी / कर्मचारी म्हणून त्यांनी जिल्ह्यात आपली वेगळी छाप उमटवली. ज्या-ज्या ठिकाणी त्यांनी सेवा बजावली, त्या ठिकाणच्या नागरिकांनी त्यांना कर्तव्यदक्ष पोलीस अधिकारी म्हणून कायम स्मरणात ठेवले आहे. त्यांच्या सेवानिवृत्तीमुळे पोलीस दलात एक अनुभवी व जनतेसाठी झटणारा अधिकारी / कर्मचारी सेवानिवृत्ती होत असल्याची भावना व्यक्त होत आहे.
साळुंखे यांना एक मुलगा व एक मुलगी असून मुलगा चोलामंडलम फायनान्स, धाराशिव येथे कार्यरत आहे. मुलगी एम. फार्मसी शिक्षण घेऊन सध्या बीके कॉलेजमध्ये नोकरी करत आहे. दोन्ही मुले विवाहित असून आपल्या क्षेत्रात प्रगती करत आहेत.
त्यांच्या प्रदीर्घ सेवाकाळातील कार्याची जिल्हा पोलीस दलाकडून विशेष दखल घेण्यात आली असून वरिष्ठ अधिकारी, सहकारी कर्मचारी व नागरिकांनी त्यांना पुढील आयुष्यासाठी मनःपूर्वक शुभेच्छा दिल्या आहेत.
