धाराशिव जिल्ह्यातील वादग्रस्त महाकाली, पिंजरा, साई कला केंद्र पुन्हा चर्चेत कलेच्या नावाखाली देहव्यापार रॅकेट उघड, 9 आरोपींवर गुन्हा
धाराशिव | लोकमदत न्यूज
धाराशिव जिल्ह्यातील वादग्रस्त ठरलेली महाकाली, पिंजरा व साई कला केंद्रे पुन्हा एकदा गंभीर कारणांमुळे चर्चेत आली असून, कलेच्या नावाखाली चालणाऱ्या देहव्यापाराच्या रॅकेटचा धक्कादायक पर्दाफाश झाला आहे. एका विवाहित पीडित महिलेच्या तक्रारीवरून 9 संशयित आरोपींविरोधात गुन्हा दाखल करण्यात आला आहे.
या प्रकरणातील आरोपींमध्ये पुणे वाघोली येथील सोनाली वाघ, लातूर येथील सचिन चंद्रकांत कापसे, सोनाली चंद्रकांत कापसे, अजय कापसे, अनिता कापसे, कविता कोळपेकर, बीड परळी येथील माधुरी गिरी, तसेच धाराशिव येथील अंजली यांचा समावेश आहे.
पीडित महिलेच्या फिर्यादीनुसार, ती विवाहित असून पतीकडून होत असलेल्या मारहाणीला कंटाळून तिने तिची व्यथा मैत्रीण सोनाली वाघ हिला सांगितली. त्यानंतर तिला येडशी येथील पिंजरा कला केंद्रात आणण्यात आले. येथे तिची ओळख मालकीण कविता कोळपेकर व व्यवस्थापक सचिन चंद्रकांत कापसे यांच्याशी करून देण्यात आली. काही दिवसांतच येथे ग्राहकांसाठी मुलींची निवड करून देण्याचा प्रकार सुरू असल्याचे तिच्या लक्षात आले.
तिने विरोध केल्यानंतर तिला मारहाण करून जबरदस्तीने डांबून ठेवण्यात आले. त्यानंतर सचिन कापसे याने एका ग्राहकासोबत लॉजवर नेऊन जबरदस्तीने अनैतिक संबंध ठेवण्यास भाग पाडले. लग्नाचे आमिष दाखवूनही तिच्याशी संबंध ठेवण्यात आल्याचे तक्रारीत नमूद आहे.
यानंतर आरोपींनी तिला लातूर येथे नेले, जिथे सोनाली चंद्रकांत कापसे हिच्याकडे काही दिवस ठेवून पुन्हा मारहाण करण्यात आली. पुढे औसा रोडवरील बुधडा कला केंद्र येथे रेखा जाधव या मालकीणीकडे तब्बल 30 हजार रुपयांत “कामासाठी” ठेवण्यात आले. येथेही तिला देहव्यापार करण्यास भाग पाडण्यात आले.
त्यानंतर सोनाली कापसे व अनिता कापसे यांनी तिला येरमाळा येथील महाकाली कला केंद्रात आणले, जिथे माधुरी गिरी हिच्याकडे राहण्यास भाग पाडून ग्राहकांकडून पैसे घेऊन देहव्यापार करवून घेतल्याचा आरोप आहे. तसेच साई कला केंद्र या नावाखालीही हा प्रकार सुरू असल्याचे पीडितेने स्पष्ट केले आहे.
या प्रकरणी पिटा कायदा तसेच भारतीय न्याय संहिता कलम 115(2), 3(5), 351(3) व 64(2)(m) अंतर्गत पुणे ग्रामीणमधील वालचंदनगर पोलिस ठाण्यात गुन्हा दाखल करण्यात आला असून पुढील तपास धाराशिव ग्रामीण पोलिसांकडे वर्ग करण्यात आला आहे.
दरम्यान, आरोपींनी अटक टाळण्यासाठी अटकपूर्व जामिनासाठी न्यायालयात अर्ज केला होता. सुनावणीदरम्यान ॲड. अमोल वरुडकर यांनी आरोपींच्या वतीने युक्तिवाद करताना तक्रार ही आकसापोटी करण्यात आल्याचा दावा केला. तसेच आरोपींचा थेट सहभाग अद्याप स्पष्ट झालेला नसून ते तपासात सहकार्य करण्यास तयार असल्याचे नमूद केले. कोणतीही जप्ती बाकी नसल्याने पोलिस कोठडीची गरज नसल्याचा युक्तिवादही करण्यात आला.
या युक्तिवादावर न्यायालयाने विचार करून आरोपी कविता कोळपेकर हिला अटकपूर्व जामीन मंजूर केला. या प्रकरणात ॲड. वैभव खांडेकर, ॲड. बालाजी पोतदार, ॲड. सचिन जाधव, ॲड. जनक साळुंखे, ॲड. विक्रम माने व ॲड. दीपक तुपसुंदरे यांनीही काम पाहिले.
दरम्यान, जिल्ह्यातील कला केंद्रे आधीपासूनच वादाच्या भोवऱ्यात असताना हा प्रकार उघड झाल्याने प्रशासनाच्या कारवाईवर प्रश्नचिन्ह निर्माण झाले आहे. जिल्हाधिकारी व पोलिस अधीक्षक यांच्या अहवालानंतर काही कला केंद्रांचे परवाने रद्द करण्यात आले असले, तरी प्रत्यक्षात अशा बेकायदेशीर प्रकारांना आळा बसला का, हा प्रश्न उपस्थित होत आहे.
याच पार्श्वभूमीवर जिल्ह्याचे पालकमंत्री प्रतापराव सरनाईक यांनी यापूर्वीच चुकीचे प्रकार करणाऱ्या कला केंद्रांवर कठोर कारवाई करण्याचे स्पष्ट निर्देश दिले होते. मात्र, अशा प्रकारची घटना पुन्हा समोर आल्याने स्थानिक प्रशासनाने त्या निर्देशांची प्रभावी अंमलबजावणी केली का, यावर प्रश्नचिन्ह उपस्थित होत आहे.
महाकाली, पिंजरा व साई कला केंद्र पुन्हा एकदा चर्चेत आले असून, जिल्ह्यातील इतर कला केंद्रांमध्येही अशाच प्रकारे महिलांचे शोषण होत आहे का, याची सखोल चौकशी करण्याची मागणी होत आहे. आता तरी प्रशासन कठोर कारवाई करणार का, की अशा प्रकारांना पुन्हा मोकळे रान मिळणार, याकडे सर्वांचे लक्ष लागले आहे.
लोकमदत न्यूज सत्य शोधून लिहिण्याची ताकद संपादक अमजद सय्यद 8390088786
