भाजपाचे युवा नेते मल्हार पाटील यांनी घेतले संत गोरोबा काका यांच्या पालखीचे दर्शन
धाराशिव दि.२३ (प्रतिनिधी) – कार्तिकी वारीचा सोहळा सुरू झाला असून वारकऱ्यांसह सर्वसामान्य भाविक भक्त व नागरिक पंढरीच्या पांडुरंगाचे दर्शन घेण्यासाठी आतुर झाले आहेत. दीपावलीचा सोहळा संपतो न संपतो तोच भाऊबीजेच्या दिवशीच विठ्ठलाच्या भेटीसाठी संतांच्या पालख्या पंढरीच्या दिशेने रवाना झालेल्या आहेत. या पालख्यांमध्ये धाराशिव तालुक्यातील श्रीक्षेत्र तेर येथील संत शिरोमणी श्री संत गोरोबाकाकांचा पालखीचे प्रस्थान दि.२३ ऑक्टोबर रोजी तेर येथून पंढरपूर येथे होणाऱ्या कार्तिक एकादशी सोहळ्यामध्ये सहभागी होण्यासाठी प्रस्थान केले. दरम्यान, या पालखी सोहळ्यात भारतीय जनता पार्टीचे युवा नेते मल्हार राणाजगजितसिंह पाटील यांनी सहभागी होत संत गोरोबाकाका यांच्या पालखीचे मनोभावे पूजन करीत दर्शन घेतले.
धाराशिव तालुक्यातील श्रीक्षेत्र तेर येथे संत गोरोबाकाकांच्या पालखीचे पूजन करून हजारो भक्तांच्या उपस्थितीत विठोबा माऊली, ज्ञानोबा माऊली, तुकोबा माऊली, संत गोरोबाकाका आदी नामांचा गजर करीत टाळ मृदुंगाच्या तालात वाजत गाजत निरोप देण्यात आला. या पालखी सोहळ्यामध्ये महिला पुरुष वारकरी मोठ्या संख्येने भगवी पताका, हातात टाळ, मृदुंग व विना सहभागी झाले होते.
