आमदार सावंत यांच्या झंझावाती नेतृत्वावर विश्वास – राष्ट्रवादीच्या दिग्गजांचा शिवसेनेत जाहीर प्रवेश
परांडा दिनांक २०(प्रतिनिधी):महाराष्ट्र राज्याचे माजी आरोग्यमंत्री तथा भूम–परंडा–वाशी विधानसभा मतदारसंघाचे आमदार प्रा. डॉ. तानाजीराव सावंत यांच्या दूरदृष्टीपूर्ण नेतृत्वावर आणि विकासाभिमुख कार्यपद्धतीवर विश्वास ठेवत राष्ट्रवादी काँग्रेसच्या अनेक दिग्गज पदाधिकाऱ्यांनी अधिकृतपणे शिवसेनेत प्रवेश केला. शिवसेना नेते राजन साळवी यांच्या उपस्थितीत हा पक्षप्रवेश सोहळा उत्साहात पार पडला.
यामध्ये राष्ट्रवादी काँग्रेसचे युवक नेते बालाजी आण्णा घोलप, तेरखेड्याचे उपसरपंच कलाम उर्फ फरीद पठाण सर, ज्येष्ठ नेते अच्युत शिंदे आणि तेरखेडा ग्रामपंचायत सदस्य सोहम सरवदे यांनी आपल्या असंख्य समर्थकांसह शिवसेनेत प्रवेश केला. यासोबतच युवा नेते नितीन घुले, उद्योजक संदीप देशमुख तसेच कडकनाथवाडीचे माजी सरपंच दिनेश मुळे यांनीही भगवा झेंडा हाती घेत शिवसेनेत सहभाग नोंदवला.
या वेळी उपस्थितांना मार्गदर्शन करताना आमदार प्रा. डॉ. तानाजीराव सावंत यांनी सांगितले की, “सामान्य जनतेचा विश्वास, विकासकामांचा वेग आणि सर्वसमावेशक राजकारण हीच शिवसेनेची ओळख आहे. नव्याने प्रवेश करणाऱ्या सर्व सहकाऱ्यांच्या माध्यमातून मतदारसंघातील प्रश्न अधिक ताकदीने सोडवता येतील.”
राजन साळवी यांनीही नव्या पदाधिकाऱ्यांचे स्वागत करत, तानाजीराव सावंत यांच्या नेतृत्वाखाली शिवसेना अधिक मजबूत होत असून जनतेच्या विकासाच्या अपेक्षा पूर्ण करण्यासाठी पक्ष कटिबद्ध असल्याचे स्पष्ट केले.
या पक्षप्रवेशामुळे भूम–परंडा–वाशी मतदारसंघात शिवसेनेचे संघटन अधिक बळकट होणार असून, आमदार तानाजीराव सावंत यांच्या झंझावाती नेतृत्वाला नवी ऊर्जा मिळाल्याचे चित्र दिसून येत आहे.
लोकमदत न्यूज सत्य शोधून लिहिण्याची ताकद
संपादक अमजद सय्यद 8390088786
