एसटी कर्मचाऱ्यांना दिवाळीचा गोडवा — ६ हजार भेट, १२,५०० अग्रीम आणि वेतनवाढीचा फरक देण्याचा शासन निर्णय
मुंबई : राज्यातील सुमारे ८५ हजार एसटी कर्मचारी आणि अधिकाऱ्यांसाठी यंदाची दिवाळी गोड ठरणार आहे. उपमुख्यमंत्री एकनाथ शिंदे यांच्या अध्यक्षतेखाली आणि परिवहन मंत्री प्रताप सरनाईक यांच्या उपस्थितीत सह्याद्री अतिथीगृह येथे झालेल्या बैठकीत कर्मचाऱ्यांना दिवाळी भेट म्हणून ६ हजार रुपये सानुग्रह अनुदान देण्याचा, पात्र कर्मचाऱ्यांना १२ हजार ५०० रुपये सण अग्रीम देण्याचा आणि २०२० ते २०२४ दरम्यानच्या वेतनवाढीचा फरक दरमहा वेतनासोबत देण्याचा महत्त्वपूर्ण निर्णय घेण्यात आला.
या बैठकीस उपमुख्यमंत्र्यांचे प्रधान सचिव नविन सोना, वित्त विभागाचे अप्पर मुख्य सचिव ओमप्रकाश गुप्ता, परिवहन विभागाचे अप्पर मुख्य सचिव संजय सेठी, एसटी महामंडळाचे उपाध्यक्ष आणि व्यवस्थापकीय संचालक डॉ. माधव कुसेकर, सहसचिव राजेंद्र होळकर तसेच विविध कर्मचारी संघटनांचे प्रतिनिधी उपस्थित होते.
शासनाने सर्व कर्मचारी व अधिकाऱ्यांना दिवाळी भेट म्हणून ६ हजार रुपये देण्यासाठी सुमारे ५१ कोटी रुपयांचे अनुदान मंजूर केले आहे. तसेच २०२० ते २०२४ या कालावधीत झालेल्या वेतनवाढीतील फरकाची रक्कम कर्मचाऱ्यांना दरमहा वेतनासोबत देण्यासाठी शासनाने दरमहा ६५ कोटी रुपयांची तरतूद केली आहे. याशिवाय, सण अग्रीम म्हणून पात्र कर्मचाऱ्यांना १२ हजार ५०० रुपये देण्यासही शासनाने परवानगी दिली असून त्यासाठी एसटी महामंडळाने ५४ कोटी रुपयांची मागणी शासनाकडे केली आहे.
“एसटी कर्मचाऱ्यांची दिवाळी देखील गोड झाली पाहिजे म्हणून शासनाने आज हा निर्णय घेतला आहे. त्याचबरोबर एसटी महामंडळ आर्थिकदृष्ट्या सक्षम व्हावे यासाठी विविध उपाययोजना सुरू आहेत,” असे प्रतिपादन परिवहन मंत्री प्रताप सरनाईक यांनी केले.
या निर्णयामुळे एसटी महामंडळातील सर्व स्तरांवरील कर्मचाऱ्यांमध्ये आनंदाचे वातावरण निर्माण झाले असून, गेल्या काही महिन्यांपासून मागणी असलेल्या सणभत्त्याचा प्रश्न अखेर सुटला आहे. शासनाच्या या निर्णयामुळे एसटी कर्मचाऱ्यांची दिवाळी यंदा विशेष उजळून निघणार आहे.
लोकमदत न्यूज संपादक अमजद सय्यद 8390088786
