ऑपरेशन मुस्कान-14 मोहिमेत उल्लेखनीय कामगिरी एएचटीयूच्या अधिकारी-कर्मचाऱ्यांचा आयजी वीरेंद्र मिश्रा यांच्या हस्ते सत्कार
हरवलेल्या व पीडितांचा शोध घेऊन सुरक्षित सुटका करण्यात पथकाचे मोलाचे योगदान
धाराशिव | लोकमदत न्यूज
महाराष्ट्र पोलिसांतर्गत धाराशिव जिल्हा पोलिसांनी राबवलेल्या ऑपरेशन मुस्कान-14 मोहिमेत उल्लेखनीय कामगिरी केल्याबद्दल एएचटीयू (Anti Human Trafficking Unit) धाराशिव येथील अधिकारी व कर्मचारी यांचा विशेष सत्कार करण्यात आला. विशेष पोलीस महानिरीक्षक वीरेंद्र मिश्रा (छत्रपती संभाजीनगर परिक्षेत्र) यांच्या हस्ते हा सत्कार करण्यात आला. यावेळी जिल्हा पोलीस अधीक्षक रितू खोखर तसेच अप्पर पोलीस अधीक्षक शफकत आमना उपस्थित होते.
या मोहिमेदरम्यान हरवलेल्या व पीडित व्यक्तींचा शोध घेऊन त्यांची सुरक्षित सुटका करण्यात महत्त्वपूर्ण भूमिका बजावणाऱ्या पथकाला प्रशस्तिपत्र देऊन गौरविण्यात आले.
या मोहिमेत पोलीस उपनिरीक्षक सोनटक्के एस. ए., म.हे.कॉ. नदाफ आर. एस., म.हे.कॉ. पुरी व्ही. पी., म.हे. कॉ. जाधव ए. एस., हे. कॉ. केवटे डी. के., हे. कॉ. माने एन. एस. तसेच पो.कॉ. कंदले ए. व्ही. यांनी सक्रिय सहभाग घेत महत्त्वाची जबाबदारी पार पाडली. पथकाने हरवलेल्या व पीडित व्यक्तींचा शोध घेऊन त्यांना सुरक्षितरीत्या त्यांच्या कुटुंबियांच्या स्वाधीन करण्याचे कार्य केले.
या मोहिमेदरम्यान पोलीस ठाणे कळंब गुन्हा क्र. 414/2023 (कलम 363, 370 भा.दं.वि.), कळंब पोलीस ठाणे गुन्हा क्र. 178/2025 (कलम 137(2), 143 बीएनएस) तसेच पोलीस ठाणे ढोकी गुन्हा क्र. 181/2023 (कलम 363, 370 भा.दं.वि.) या प्रकरणांमध्ये तपास करत पीडितांचा शोध घेण्यात या पथकाने उल्लेखनीय यश संपादन केले.
दरम्यान, गुन्ह्यांची गुंतागुंत, तपासातील अडचणी आणि विविध आव्हाने असूनही एएचटीयू पथकाने चिकाटीने तपास करत अल्पावधीत यश संपादन केले. या कामगिरीमुळे पोलिसांबद्दल समाजात विश्वास आणि सकारात्मक प्रतिमा अधिक दृढ होण्यास मदत झाल्याचे मत वरिष्ठ अधिकाऱ्यांनी व्यक्त केले.
पुढील काळातही अशाच प्रकारे गुन्ह्यांचा छडा लावत पीडितांना न्याय मिळवून देत पोलीस दलाचे नाव उज्ज्वल करावे, अशी अपेक्षा यावेळी वरिष्ठ अधिकाऱ्यांनी व्यक्त केली.
लोकमदत न्यूज सत्य शोधून लिहिण्याची ताकद
संपादक अमजद सय्यद 8390088786
