वरिष्ठ तुरुंग अधिकाऱ्यावर महिला शिपायाचे गंभीर आरोप – गुन्हा दाखल करण्याची मागणी
स्थानिक पोलीस गुन्हा दाखल करण्यास टाळाटाळ करीत असल्याने महिला शिपाई कर्मचाऱ्याची पोलीस अधीक्षकांकडे धाव!
धाराशिव दि.२७ (प्रतिनिधी):धाराशिव जिल्हा कारागृहात कार्यरत असलेले पीडित महिला शिपाई यांनी आपल्या वरिष्ठ तुरुंग अधिकारी लहू रावसाहेब सांगळे यांच्यावर विनयभंग, अश्लील भाषेत बोलणे, मानसिक छळ तसेच नोकरीवरून काढून टाकण्याची धमकी दिल्याचे गंभीर आरोप केले असून याबाबत त्यांनी २५ सप्टेंबर रोजी आनंदनगर पोलीस ठाण्यात लेखी तक्रार दिली आहे. मात्र, आरोपी अधिकारी वरिष्ठ पदावर असल्याने पोलीस निरीक्षक रवींद्र खांडेकर यांनी तत्काळ गुन्हा दाखल न करता केवळ चौकशी करून निर्णय घेऊ असे सांगून तक्रारीची नोंद टाळल्याचे पोलीस अधीक्षकांना दिलेल्या तक्रारी अर्जात नमूद केले आहे. या निष्काळजीपणाविरोधात पीडित महिला कर्मचारी यांनी थेट पोलीस अधीक्षक धाराशिव यांच्याकडे धाव घेत गुन्हा दाखल करण्याची मागणी निवेदनाद्वारे केली आहे.
महिला कर्मचारी यांनी तक्रारी अर्जात नमूद केले आहे की, जून २०२५ मध्ये सांगळे तुरुंगाधिकारी श्रेणी एक म्हणून रुजू झाल्यापासून ते सतत अश्लील हावभाव, एकटक बघणे, अपमानास्पद भाषा वापरणे आणि वारंवार बंगल्यावर बोलावण्याचा दबाव टाकत आहेत. ४ व ५ ऑगस्ट 2025 रोजी कार्यालयीन कामकाज करत असताना त्यांनी तिला लज्जास्पद वागणूक दिली. तसेच ३२८ लिटर डिझेलचे बनावट कोटेशन शासकीय निधीतून पास करण्यासाठी तिच्याकडे तगादा लावला, ऑनलाईन पावतीसाठी बंगल्यावर यावे लागेल असे सांगून त्रास दिला.
२४ सप्टेंबर रोजी कर्तव्यावर असताना दुपारी सांगळे यांनी “तुझा …… मीच जिरवणार आहे, तक्रार केलीस तरी तुला सोडणार नाही” अशा धमकीच्या शब्दांत बोलून मानसिक धक्का दिला. याआधीही तिने जिल्हाधिकारी, कारागृह उपमहानिरीक्षक तसेच महिला तक्रार निवारण समितीकडे तक्रार केली होती. मात्र, त्यानंतर सांगळे यांनी आणखी संतापून तिची बदनामी करण्यास सुरुवात केल्याचे निवेदनात म्हटले आहे.
पीडित महिला कर्मचारी निवेदनात म्हटले आहे की सहकारी महिला व पुरुष कर्मचारीदेखील नोकरीच्या भीतीने तिच्या बाजूने बोलण्यास टाळाटाळ करत आहेत. परिणामी ती सतत मानसिक, भावनिक व शारीरिक छळ सहन करत असून तिच्या जीवितास धोका निर्माण झाला आहे.
या प्रकरणामुळे महिला सुरक्षेचा प्रश्न गंभीरपणे ऐरणीवर आला आहे. पीडित महिला कर्मचारी यांनी पोलीस अधीक्षकांनी तात्काळ गुन्हा दाखल करून आरोपीवर कायदेशीर कारवाई करावी व मला न्याय द्यावा, अशी मागणी केली आहे. महिलांच्या सुरक्षिततेच्या दृष्टीने या प्रकरणाची तात्काळ दखल घेऊन कठोर पावले उचलावीत, अशी मागणी देखील केली आहे.
लोकमदत न्यूज “सत्य शोधून लिहिण्याची ताकद”
संपादक अमजद सय्यद 8390088786
