सांजा जिल्हा परिषद गटात परंपरेची पुनरावृत्ती – प्रदीप घोणे विक्रमी मताधिक्याने विजयी
नगर परिषद नगरसेवक ते जिल्हा परिषद सदस्य — प्रदीप घोणेंचा विजयी योगायोग कायम
धाराशिव लोकमदत न्यूज
धाराशिव जिल्हा परिषद निवडणुकीची आज मतमोजणी पार पडली असून जिल्ह्यातील अनेक गटांमध्ये चुरशीच्या लढती पाहायला मिळाल्या. यामध्ये सांजा जिल्हा परिषद गट विशेष चर्चेचा ठरला असून शिवसेना (उद्धव बाळासाहेब ठाकरे) पक्षाचे उमेदवार प्रदीप घोणे यांनी ११७९ विक्रमी मताधिक्याने विजय मिळवला आहे.
सांजा जिल्हा परिषद गटाची राजकीय परंपरा पाहता दरवेळी मतदारसंघाबाहेरील उमेदवार विजयी होण्याचा योगायोग कायम राहिला असून यंदाही तीच परंपरा कायम राहिली आहे. याआधी 2017 मध्ये याच गटातून धाराशिव-कळंब विधानसभा मतदारसंघाचे विद्यमान आमदार कैलास घाडगे पाटील विजयी झाले होते.
यंदाच्या निवडणुकीत शिवसेना (उद्धव ठाकरे) पक्षाकडून धाराशिव शहरातील अनुभवी राजकारणी प्रदीप घोणे यांना उमेदवारी देण्यात आली होती. घोणे यांनी याआधी धाराशिव नगरपरिषद निवडणुकीत दोन वेळा वेगवेगळ्या प्रभागांतून विजय मिळवला असून त्यांच्या राजकीय अनुभवाचा लाभ या निवडणुकीतही झाला.
दुसरीकडे भारतीय जनता पक्षाने सांजा गटातील स्थानिक उमेदवार देत निवडणूक अतिशय चुरशीची केली होती. भाजपकडून अनेक वरिष्ठ नेत्यांनी प्रचारात सहभाग घेतला होता. तसेच शिवसेना उद्धव ठाकरे गटातील काही कार्यकर्त्यांनी भाजपमध्ये प्रवेश केल्यामुळे लढत अत्यंत रंगतदार होईल, असे चित्र सुरुवातीपासून दिसत होते. ‘स्थानिक उमेदवार विरुद्ध बाहेरील उमेदवार’ असा प्रचारही रंगला होता.
मात्र आमदार कैलास पाटील, खासदार ओमप्रकाश राजेनिंबाळकर, माजी नगराध्यक्ष मकरंद राजे निंबाळकर यांच्या प्रभावी नियोजनासोबतच प्रदीप घोणे यांचा दांडगा राजकीय अनुभव या सर्व घटकांमुळे अखेर विजयाचा झेंडा शिवसेनेने फडकावला. परिणामी सांजा गटात पुन्हा एकदा बाहेरच्या उमेदवारानेच बाजी मारल्याचे चित्र स्पष्ट झाले आहे.
प्रदीप घोणे हे दरवेळी वेगवेगळ्या मतदारसंघांतून निवडणूक लढवून सातत्याने विजय मिळवणारे उमेदवार म्हणून ओळखले जात असून, यंदाही सांजा जिल्हा परिषद गटातून त्यांनी आपली विजयी परंपरा कायम ठेवली आहे. त्यांच्या या विजयामुळे धाराशिव जिल्ह्याच्या राजकारणात नव्या चर्चांना उधाण आले आहे.
लोकमदत न्यूज सत्य शोधून लिहिण्याची ताकद
संपादक अमजद सय्यद 8390088786
