अनधिकृत बॅनरांनी जिल्हाधिकारी कार्यालय परिसर गजबजला – सत्ताधारी आणि विरोधी पक्षाच्या नेत्यांनी नियम बांधले दावणीला, प्रशासन बघ्याच्या भूमिकेत!
धाराशिव (प्रतिनिधी): धाराशिव जिल्हाधिकारी कार्यालयाच्या मुख्य प्रवेशद्वारासमोरच सत्ताधारी आणि विरोधक या दोन्ही पक्षांच्या कार्यकर्त्यांनी अनधिकृत बॅनर लावण्याची स्पर्धा सुरू केली आहे. “#हीच तुझी लायकी”, “धाराशिवच्या विकासाचा नुसता भास, कमिशन घेऊन केला स्वतःचा विकास” अशा आशयाचे फलक झळकत असून, हे बॅनर सध्या शहरात चर्चेचा विषय ठरत आहेत.
धाराशिव शहरातील रस्त्याच्या कामांवरील स्थगिती निर्णयानंतर राजकीय वातावरण तापले असून, विरोधकांनी आमदार राणाजगजीतसिंह पाटील यांच्यावर टीका करणारे बॅनर लावले आहेत, तर सत्ताधारी भाजप कार्यकर्त्यांनीही प्रत्युत्तर देत खासदार ओम प्रकाश राज निंबाळकर आमदार कैलास पाटील यांना लक्ष्य करणारे फलक झळकवले आहेत. विशेष म्हणजे, या दोन्ही पक्षांच्या बॅनरांवर नगरपरिषदेचा परवाना क्रमांक किंवा क्यूआर कोड नसल्याने ही बॅनरबाजी थेट नियमांचे उल्लंघन करणारे आहेत.
जिल्हाधिकारी कार्यालयाच्या दारातच असे अनधिकृत बॅनर लावले जाणे हे प्रशासनासाठी लाजिरवाणे चित्र दिसून येत आहे. नागरिकांनी संतप्त सवाल उपस्थित करीत “नियम सर्वांसाठी सारखे असतील तर मग प्रशासन गप्प का?”
दरम्यान, शहरातील रस्त्यांच्या कामांवरील स्थगितीमुळे निर्माण झालेला वाद आणखी तीव्र होत असून, राजकारणाचा केंद्रबिंदू आता जिल्हाधिकारी कार्यालयाचा फलक बनला आहे. नागरिक मात्र प्रशासनाने त्वरित कारवाई करून अनधिकृत बॅनर हटवावेत, अशी मागणी जोर धरू लागली आहे.
लोकमदत न्यूज सत्य शोधून लिहिण्याची ताकद
संपादक अमजद सय्यद 8390088786
