महाकाली कला केंद्रावर गुंडांचा हल्ला महिलांना मारहाण करीत तोडफोड व लूट ८.१० लाखांचे नुकसान, येडशी येथील सुनील शेळकेंसह अनेकांवर गुन्हा दाखल
धाराशिव | लोकमदत न्यूज
कळंब तालुक्यातील चोराखळी येथील महाकाली कला केंद्रावर सशस्त्र हल्ला करत मारहाण, तोडफोड व लूटमार केल्याची धक्कादायक घटना उघडकीस आली आहे. या प्रकरणी येरमाळा पोलीस ठाण्यात भारतीय न्याय संहिता (BNS 2023) अन्वये गंभीर कलमांखाली गुन्हा दाखल करण्यात आला असून एकूण नुकसान अंदाजे ८ लाख १० हजार रुपये इतके असल्याचे फिर्यादीत म्हंटले आहे.
फिर्यादी कशिष राजेश शेरकर (वय २०, रा. इंगळे गल्ली, धाराशिव, सध्या मुक्काम महाकाली कला केंद्र, चोराखळी) यांनी दिलेल्या तक्रारीनुसार, त्या महाकाली सांस्कृतिक कला केंद्र पार्टी मालकीण म्हणून काम करत असून त्यावर कुटुंबाचा उदरनिर्वाह अवलंबून आहे.
दि. ११ एप्रिल २०२६ रोजी सायंकाळी सुमारे ७ वाजता, त्या आपल्या रूममध्ये असताना अचानक काही आरोपी वाहनाने येऊन केंद्रासमोर थांबले. सुनील शेळके, जयंत भोसले, नागेश लोखंडे, हनुमंत शेळके, योगेश चव्हाण, दिनेश चव्हाण, सोनू पवार (सर्व रा. येडशी) व अन्य ५ ते ६ अनोळखी व्यक्तींनी केंद्रात घुसून नर्तिकांवर मारहाण करण्यास सुरुवात केली.
या गोंधळात जयंत भोसले याने कामगार महादेव सिद्धाराम पवार याच्यावर कोयत्याने हल्ला केल्याचेही तक्रारीत नमूद केले आहे. त्यानंतर आरोपींनी रूम च्या खिडक्या फोडून दरवाजा तोडत आत प्रवेश केला. फिर्यादीच्या आई रेखा शेरकर यांना केसाने ओढून मारहाण करण्यात आली. फिर्यादीलाही शिवीगाळ करत लाथाबुक्क्यांनी मारहाण करण्यात आली व जीवे मारण्याची धमकी देण्यात आली.
आरोपींनी कोयता व तलवारीच्या धाकावर घरातील साहित्याची मोठ्या प्रमाणावर तोडफोड केली. यामध्ये कार्डिओ मशीन, रनिंग मशीन, टीव्ही, फ्रिज, एसी, कपाट तसेच सीसीटीव्ही कॅमेरे, ७० प्लास्टिक खुर्च्या, पाण्याचे जार, लाईट बल्ब व इतर साहित्य फोडण्यात आले. तसेच कपाटातून सुमारे २ लाख रुपये रोख रक्कम, ५ तोळ्याचे सोन्याचे लॉकेट व १२ ग्रॅम वजनाची सोन्याची साखळी लंपास करण्यात आली.
याशिवाय पार्किंगमध्ये उभी असलेली महिंद्रा XUV 500 (MH-14 DN 6809) या वाहनाचीही तोडफोड करण्यात आली. या सर्व प्रकारात एकूण सुमारे ८.१० लाख रुपयांचे नुकसान झाल्याचे तक्रारीत नमूद आहे.
या प्रकरणी येरमाळा पोलीस ठाण्यात भारतीय न्याय संहिता २०२३ अंतर्गत विविध गंभीर कलमांखाली गुन्हा दाखल करण्यात आला असून पुढील तपास पोलीस अधिकारी स्वप्निल भोजगुडे हे करीत आहेत.
या घटनेमुळे परिसरात भीतीचे वातावरण निर्माण झाले असून आरोपींवर कठोर कारवाई करण्याची मागणी शेरकर यांनी केली आहे.
लोकमदत न्यूज सत्य शोधून लिहिण्याची ताकद संपादक अमजद सय्यद 8390088786
