लोकमदत न्यूजचा पुन्हा दणका! धाराशिव बसस्थानकात ‘पास लूट’ पूर्णपणे बंद
विभागीय नियंत्रक अजय पाटील यांची कठोर भूमिका एजन्सीवर कारवाईचा बडगा!
नवीन मशीनद्वारे पारदर्शक सेवा लवकरच ज्येष्ठ व दिव्यांगांकडून समाधान व्यक्त
धाराशिव | लोकमदत न्यूज
धाराशिव येथील मध्यवर्ती बसस्थानकात ज्येष्ठ नागरिक व दिव्यांग प्रवाशांकडून पासेसच्या नावाखाली सुरू असलेल्या आर्थिक लुटीचा पर्दाफाश लोकमदत न्यूजने प्रसिद्ध केल्यानंतर प्रशासनाने केवळ काऊंटर बंद करण्यापुरती मर्यादा न ठेवता, संपूर्ण प्रक्रियेत सुधारणा करण्याचे ठोस पाऊल उचलले आहे. विभागीय नियंत्रक अजय पाटील यांनी घेतलेल्या कडक भूमिकेमुळे हा प्रकार पूर्णपणे थांबवण्यात यश आले असून प्रवासी वर्गातून समाधान व्यक्त होत आहे.
दि. १ एप्रिल रोजी प्रसिद्ध झालेल्या वृत्तामध्ये ‘199 रुपये’ शुल्क असताना 230 ते 250 रुपये वसूल केले जात असल्याचा प्रकार उघडकीस आला होता. या प्रकरणात एजन्सी व दलालांचा मनमानी कारभार, तसेच पत्रकारांवर दबाव टाकण्याचे प्रकारही समोर आले होते. यानंतर प्रशासनावर कारवाईचा दबाव वाढताच तातडीने संबंधित काऊंटर बंद करण्यात आला.
विभागीय नियंत्रक अजय पाटील यांनी दिलेल्या माहितीनुसार, सध्या संबंधित काऊंटर पूर्णपणे बंद असून पुढील दोन दिवसांत नवीन मशीनद्वारे पारदर्शक पद्धतीने पास वितरण सुरू करण्यात येणार आहे. तसेच भविष्यात कोणत्याही प्रकारची जादा वसुली होऊ नये, यासाठी स्पष्ट सूचना देण्यात आल्या आहेत.
यासोबतच, परिवहन विभागाच्या वतीने ठरवून दिलेल्या शुल्कापेक्षा अधिक शुल्क आकारल्यास कडक कारवाई केली जाईल, असा इशाराही देण्यात आला आहे. या संपूर्ण प्रक्रियेची जबाबदारी स्थानक प्रमुखांवर सोपविण्यात आली असून त्यांच्या नियंत्रणाखालीच ज्येष्ठ नागरिक व दिव्यांगांना पास वितरण केले जाणार आहे.
दरम्यान, सध्या सुरू असलेल्या आयडी व पास वितरण प्रक्रियेत वारंवार अनेक तक्रारी येत असल्याने संबंधित आयडी धारकांना ‘काळ्या यादीत’ टाकण्याची शिफारस वरिष्ठ कार्यालयाकडे करण्यात आली आहे.
विभागीय नियंत्रक अजय पाटील यांनी घेतलेली आक्रमक भूमिका आणि तत्पर कारवाई यामुळे ज्येष्ठ नागरिक व दिव्यांग प्रवाशांची सुरू असलेली लूट थांबली असून त्यांच्या कार्याचे सर्व स्तरातून कौतुक होत आहे.
दरम्यान, लोकमदत न्यूजच्या वृत्ताची प्रभावी दखल घेतल्याबद्दल नागरिकांनी प्रशासनाचे तसेच माध्यमांचे आभार व्यक्त केले असून, भविष्यातही अशा प्रकारांवर कठोर कारवाई करण्याची अपेक्षा व्यक्त केली आहे.
लोकमदत न्यूज सत्य शोधून लिहिण्याची ताकद
संपादक अमजद सय्यद 8390088786
